Зелениот климатски фонд е нов партнер за финансирање на инвестиции во развој со ниски емисии и отпорност кон климатските промени во Република Северна Македонија. Во рамките на првиот проект од Програмата за подготвеност и подготвителна поддршка на Зелениот климатски фонд (ЗКФ), спроведен во 2019 година, ФАО ја поддржа Владата да го постави националниот механизам, институционалната рамка и процедурите потребни за ефикасно пристапување кон и распоредување на финансиските ресурси од Фондот.

Овој билтен заеднички го изработуваат Кабинетот на заменикот претседател на Владата на Република Северна Македонија одговорен за економски прашања, како Национален назначен орган (ННО) за ЗКФ и Организацијата за храна и земјоделство на Обединетите нации (ФАО), во рамките на проектот „Поддршка за управување со ефективен национален координативен механизам за Зелениот климатски фонд“.

Целта на билтенот е навремено информирање на сите национални засегнати страни во Република Северна Македонија (национални институции, владини агенции, приватниот сектор, граѓанскиот сектор, академските установи и меѓународните организации) за постигнувањата при спроведувањето на проектот и за најновите активности поврзани со ЗКФ на национално ниво, во согласност со националните приоритети и другите тековни иницијативи во врска со климатските промени. Тој содржи новини за приоритетите, процедурите, консултациите, како и новости и настани во врска со ЗКФ во Република Северна Македонија.